Lunglei dist.-a NH–54 leh NH–302 siamṭhat hna thawh dan thlirho

Lunglei district bawrhsap Navneet Mann hoin March 30, Thawhṭanni khan Revenue Branch official-te, National Highways & Infrastructure Development Corporation Ltd (NHIDCL) leh BRN Infrastructures Pvt Ltd aiawhte leh Lunglei Sub-Headquarters YMA hruaituten Lunglei district-a national highway (NH) kawngpui zauh leh siamṭhat hna kal mek dinhmun leh fur hmaa hnathawh tur hmachhawpte an sawiho.

Navneet Mann chuan, NH–54 leh NH–302 kawngpui siamṭhat hna kal mekah chak zawka hna thawh a nih theih nan NHIDCL leh contractor-te chu an nawr reng thu leh, harsatna hrang hrang avanga duh anga hna thawh chak theih loh te, khuarel thil avanga hna khaihlakte a awm ṭhin thu a sawi a, "Fur a lo thlen leh mai dawn avangin hnathawh tur ngaih pawimawh hmasakte fur hmaa thawk turin ruahmanna siam a ni," a ti a; hnathawktute chu tawngpawng nawr ringawt loin an thawh theih ngei tur chinah ruahmanna siampui a, an hna thawh dan vil leh en zui chu thil pawimawh a nih thu a sawi.

Kawng siam hna thawh chungchanga chanchin thar leh social media-a thu belhchian dawl lo a darh lohna tur leh mipuite'n kawng siam dinhmun leh ruahmanna te, hnathawh theih tur chinte chiang taka an hriat theih nan ṭhutkhawm chu koh a nih thu Bawrhsap chuan a sawi bawk.

Ṭhutkhawmah hian contractor-te chu an hnathawh tur ruahmante chak taka bawhzui tura chah an ni a; work plan an bawhzui dan leh an hnathawh dan hi April thla laihawl velah DC hoin a hmunah endik (spot verification kalpui) leh tura ruahman a ni.

ṬHUTKHAWMA TARLAN TLANGPUI

■ Lunglei district-a NH–302 hi km 95.950-a thui niin, package A&B-ah ṭhen a ni.

■ Km 52-a thui package A (Hrangchalkawn–Phairuangkai)-ah hna 65.98% thawh zawh tawh niin, km 43.950-a thui package B (Chhumkhum–Tlabung)-ah hna 63.14% thawh zawh tawh a ni.

■ NH–54 hi package - 3, 4, 5 leh 6 ṭhenkhat, a vaiin km 147.211-a thui (Bungtlang–Thingfal) chu 97% thawh zawh a ni tawh.

■ Hmun ṭhenkhata hna muan chhan leh hnathawh theih loh la awm chu ram lak leh zangnadawmna chungchanga buaina te, ram neitute leh a bul hnaia awmte lungawi lohna avanga ram buai ngaihtuah mek a nih vangte a ni.

■ Contractor BRNIPL-te chuan Theiriat leh Hrangchalkawn inkarah km 2.500-a thui kawng luan (blacktopping) hna an thawh mek thu leh April thla chhunga zawh an beisei thu an sawi.

■ Theiriata T-Way Filling Station bula leimin nasatna laiah metre 100-a sei retaining wall siam leh kawng blacktop chu April thla chhunga thawh zawh hman an beisei thu an sawi.

■ Hun awm dan azirin tuiluankawr (side drain) pawh siam nghal an tum a; Lungpuizawla kawng laih zauh hna leh lungrem (breast wall) siam hna pawh April thla chhunga zawh an tum. Phairuangkai lei siamṭhat hna an thawk mek bawk.

■ Zobawk khaw chhungah hna hmabak a la tam tham deuh avangin fur hmaa thawh hmasak ngai laite chu Zobawk Joint YMA hnenah an ngaih pawimawh hmasak dan indawt (priority list) dil niin, Joint YMA duh dan mila contractor-te'n hna an thawh theih dan tur ruahman a ni.