Mizoramah zirlaibu colour chhuttir a nih vangin MPOA an lawm

Mizoram Press Owners’ Association (MPOA) chuan thuchhuah siamin, Mizoram sorkarin kumin aṭanga zirlaibu colour a chhuttir ṭan chu an lawm thu leh kum dangah pawh phai lama chhuttir lo an mahni chhuttir zel turin sorkar an ngen.

MPOA chuan, hun engemawchen aṭanga Mizoram sorkar leh MPOA ṭangdunin Mizoram text book chhutna tur Printing Press, Phunchawng Mel-10 hmuna an din chu kumin hian hlawhtling ṭanin, a vawi khatna atan Mizoram chhungah hlawhtling takin zirlaibu colour an chhut ṭan thu an sawi a, "Kumin hian Mizoram sorkarin zirlaibu engemawzat min chhut tir ṭan ta," an ti a; theihtawp chhuaha hmalakpuitu Planning Secretary leh Science & Technology department-te chungah an lawm thu an sawi.

A vawi khatna atana Mizorama zirlaibu colour chhut a nih theih nana hmalatu Education Minister leh Printing & Stationary Minister-te chungah an lawm thu MPOA chuan an tarlang a, "An zarah liau liau harsatna lian tham awm loin tluang takin a hun takah zirlaibu kan chhu zo thei a ni. Kum lo kal zel turah pawh Mizoram text book chhut nana vai rama sum tam tak liam thla zel lo a, kan state chhunga sum a luh a, mi engemawzatin he press hi eizawnna atana an hman theih zelna tur a hma min lakpui zel turin Mizoram kan beisei," an ti bawk.