Champhai district-ah thla 2 chhungin ruihhlo kaihhnawih thubuai 20 ziaklut

Champhai District Level Narco Coordination Centre (NCORD) Committee chu March 30, Thawhṭanni khan district bawrhsap Mohammad Aaquib kaihhruaiin DC conference hall-ah an ṭhukhawm a; kumin February - March chhung hian Champhai Police leh Excise & Narcotics duty-ten ruihhlo kaihhnawih thubuai 20 ziaklutin, mi 26 an man tawh tih tarlan a ni.

Mohammad Aaquib chuan, Champhai district-a ruihhlo dona kawngah sorkar thuneitute leh tlawmngai pawl hrang hrangte inkara thawhhona ṭha tak a awm ṭhin chu a lawmthu sawiin, chhunzawm zel a ṭul thu a sawi.

Ṭhutkhawma tarlan danin, kumin February - March chhung hian Champhai District Police-te chuan NDPS Act, 1985 hnuaiah thubuai 15 an ziaklut a, mi 24 an man. Heng thubuai leh mi man kaihhnawihah hian heroin kg 1.367, methamphetamine kg 38.886, crystal meth kg 10.529 bakah ruihhlo phurh nana hman lirthei ke li nei pathum leh lirthei ke pahnih nei pathum an man.

Champhaia Excise & Narcotics department mi leh sate chuan March, 2026 chhung hian NDPS Act, 1985 hnuaiah thubuai panga ziaklutin, mi pahnih an man a; heroin gram 373.530 leh methamphetamin gram 7.900 an man a ni.

Assam Rifle-te chuan March thla chhung vek khan ramdang aṭanga dan loa cigarette lakluh bawm (case) 1,003 leh methamphetamin kg 7.907 an man bawk.