KHAWTHLIR

Hulhliap SSC skill training

Hulhliap Short Stay Centre aṭanga chhuakte tana a thlawna thiamthil zirna (skill training) – plumbing general 1st batch leh assistant electrician 4th batch chu nimin khan MFM Skill Training Centre, Dawrpui Vengtharah khar a ni a; tun ṭumah hian assistant electrician zir chhuak mi 13 leh plumbing general zir chhuak mi pakua hnenah certificate hlan a ni. MFM Skill Training Centre-ah hian Hulhliap SSC aṭanga chhuak mi 118-in training an zo tawh a ni.

Thlan laih zirtir

Republic Veng Branch YMA chuan nimin khan an veng chhunga rawltharte thlan laih an zirtir bakah, infuihtharna hun an hmanpui. Thlan laih zir ṭan hmain YMA hruaitute chuan ruihhloin a la tihbuai loh rawlthar kalkhawmte chu Mizo nun ze mawi chawmnung zel tur leh ruihhlo laka fihlim zel turin an chah.

Sorkar hmunhma tur sawiho

Lunglei District Level Authority for Mizoram Government Land Pooling & Management Scheme chu district bawrhsap Navneet Mann hoin March 30, Thawhṭanni khan an ṭhukhawm a; Lunglei khawpuia Subsidiary Intelligence Bureau (SIB) Lunglei Unit Office Cum Residence (OCR) hmun tur leh District Court hmun tur atana ram mamawh dan leh hmalak zui dan tur sawiho a ni.

Khawzawl DAMC

Khawzawl District Agricultural Marketing Committee chuan an chairman K Vanlalṭhiana, bawrhsap kaihhruaiin March 30, Thawhṭanni khan Handholding Scheme, 2024 hnuaia thlai thar market chungchang an sawiho a; secondary collection centre hrang hrang supervisor-ten sawhthing hralh tawh dan leh stock neih dan tarlangin, supervisor ruat belh chungchang leh hmalak zel dan turte sawiho a ni.