Covid-19 vaccine a rawn thleng Naktukah pek chhuah a ni dawn

Covid-19 laka invênna damdawi (vaccine) Covishield chu nimin chhun dar 1 vel khan Pune aṭangin thlawhtheihna hmangin Lengpui Airport phurh thlen a ni a, January 16, naktuk Inrinni hian hmun paliah pek chhuah ṭan a ni ang. 

Covishield hi Lengpui Airport phurh thlen a nih hnuah a phurhna tur bika ruahman lirthei hmangin police venhimna hnuaiah Health Services Directorate phurh thlen a ni a; Health Services Directorate aṭangin vaccine dahṭhatna tura ruahman Civil Hospital, Aizawlah dah leh a ni. 

Vaccine hi Aizawla hmun pathum - Aizawl Civil Hospital, ITI Veng Urban PHC leh Zoram Medical College leh, Civil Hospital, Lunglei aṭanga pek chhuah tur a ni a; pek chhuah ṭan ní, naktuk Inrinni hian hmun paliah hian mi 100 vel ṭheuh hnenah pek tum a ni.

Nimina Covishield lo thleng hi dose 18,500 a ni a, mi pakhatin dose hnih zel an chang dawn. Hei bakah hian, sorkar laipui chuan 10% chu chhe tura ngai turin state sorkarte a hriattir a, chuvangin, tun ṭuma rawn thleng hi mi 8,307-in an chang thei dawn a ni.

Sorkar laipui duh dan angin Covid-19 vaccine hi healthcare worker-te'n an dawng hmasa dawn a, dawng hmasa turin database-ah mi 14,421 thun luh a ni tawh a; chu'ngte chu Mizoram sorkar hnuaia healthcare worker mi 14,107 leh sorkar laipui hnuaia healthcare worker mi 314 an ni. Database-a hming indawt danin pek a ni ang.

Vanglaini palai zawhna chhángin Health minister Dr R Lalthangliana chuan, Covid-19 vaccine a rawn thleng ta chu lawmawm a tih thu a sawi a, "Tuna rawn thleng hi kan pek chhuah zawh hunah a dang min rawn pek leh zel kan beisei," a ti.

Health Minister sawi danin, Covid-19 vaccine a rawn thlen tâk avangin hripui vanga harsatna a reh nghal duak beisei a ni lo a, vaccine dawng lo, hri kài theihna remchang eng emaw zat an awm reng dawn. Chutih rualin, vaccine dawng an tam chhoh zel chuan Covid-19 vanga harsatna chu zàwi zâwia a kian beisei a ni.