Tui pump chhuah tur a tam tâwk Sem chhuahnaah harsatna a awm

Public Health Engineering (PHE) department hotute chuan, tui sem tur a awm ṭhat laiin a sem chhuah danah harsatna a tam thu an sawi. 

PHE secretary Lalmuanzova chuan, Aizawl tana Tlawng lui aṭanga tui pump tur a ṭhat tawk thu Vanglaini palai a hrilh a, "Ṭhál lai pawh ni se, pump kháwl a ṭhat a, current a awm ṭhat bawk chuan tui chu a awm ṭha reng. Mahse, Tuikhuahtlang zém aṭanga kan pek chhuahna line hrang hrang a buaichuar hle a, veng pakhat aṭanga veng danga kan pek chhuah dan siamṭhat ngai tam tak a awm. Chuvang chuan tui kan pek chhuah tam tak hi a chak thei lo ṭhin," a ti.

Lalmuanzova chuan, tui sem dan kalphung siamṭha turin ṭan an lâk mek thu sawiin, "CM phalnain empannel farm ruaiin DPR kan siamtir a, central lama nawr turin hma kan la mek," a ti a; "Tui sem leh connnection ti thar tur awmte kan naute'n an khawih kawp vek a, mihring indaih lohna avangin tui sem ṭhat loh chang kan nei," tiin, thawktu an indaih loh thu a sawi.

Tui semtute hnenah thil eng emaw lo pea tui dawn tam beisei ṭhin mi tam tak an awm thu sawiin Lalmuanzova chuan, "Hetiang hi kan phal lo a, mipuiin hetianga kan tih hian tui sem kawngah inthîkna leh nghawng ṭha lo a nei ṭhin. Ching tawh lo turin kan duh hle a ni," a ti. 

Tui semtute chu mi fel famkim an nih bik loh thu sawiin PHE Secretary chuan, "Zu lo khilaia tui pek tam beiseite an lo awm ṭhin a, hei hian kan naute hnathawhah leh an nunah nghawng ṭha lo tak a neihtir a, rûi chunga tui semte an awm phah fo. Mipuiin an complain leh tho a ni," a ti. Rûi chunga tui sem ṭhinte chu an vaukhân ṭhin thu leh bàn hial ngai khawpa awmte pawh an awm ṭhin thu a sawi a ni.