Thawnthu Tawi Inziahsiak lawmman sem

Mizo Language Development Board (MLDB)-in middle school zirlaite tan Thawnthu Tawi Inziahsiak an buatsaihah nimin khan Administrative Training Institute Auditorium-ah lawmman sem inkhawm buatsaih a ni a, Information and Public Relations, Printing and Stationery secretary Betsy Zothanpari Sailo-in a hmanpui.

Intihsiak hi Mizo hnam ziarâng lang thei leh Mizo ṭawng humhalhna atan December 15, 2025 aṭanga January 15, 2026 inkar khan buatsaih a ni a; sikul 19 aṭangin zirlai 66-in thawnthu tawi an thehlut.

'Zirlai mak leh hlu ber chu' tih thawnthu ziaktu Vanlalṭanpuii d/o Khawpuia, Springdale Academy, New Champhai chu pakhatna a ni a; ‘The Chocolate’ tih ziaktu Joseph Lalduhawma, Presbyterian English School, Melbuk pahnihna a ni. ‘College pass chhuak ve kha’ tih ziaktu Phoebe Lalremruati, Noah’s Foundation School, Aizawl leh ‘Ka rohlu ber’ tih ziaktu R Vanlaldampuii, PES, Champhai Zote te pathumna an ni. Pakhatna aṭanga pathumna te hi pawl 8 zirlai vek an ni.

Thawnthu Tawi Inziahsiak khârnaa khuallian IPRPS Secretary chuan, MLDB-in Mizo ṭawng hmasawnna tura thawnthu tawi inziahsiak an buatsaih chu ṭha a tih thu a sawi a; hmasawnna kal zelah mahni ṭawng bosal a, hnam dang ṭawng leh nunphungin Mizo ṭhangtharte a tibuai mek nia a hriat thu sawiin, "Hei hi ram leh hnam hmasawnna dâltu a nih mai a hlauhawm hle a ni," a ti.

Betsy Zothanpari Sailo chuan, Thawnthu Tawi Inziahsiaka telte'n intihsiak aṭangin hmasawnna nasa tak an chhar ngei a beisei tih a sawi a; nasa lehzuala ram leh hnam hmasawnna atan ngaihtuahna sêng turin MLDB hruaitute leh intihsiaka telte a chah.

Lawmman semna inkhawm hi MLDB secretary Lalsangpuia'n a kaihruai a, MLDB chairman R Lallianzuala pawhin thu a sawi. Intihsiaka pakhatnain Rs 10,000, pahnihnain Rs 5,000 leh pathumnain Rs 3,000 an dawng a; mi 12 hnenah consolation prize Rs 1,000 ṭheuh hlan a ni bawk.