KHAWTHLIR

Zu siamna tichhia

Lawngtlai police-te chuan March 31, Thawhlehni khan ram hnuaia zu siamna hmun eng emaw zat an tichhia a, mihring man erawh an nei lo. Tun hnaiah zu a hluar avang leh zu rûi, buaina siam chîng an tam avangin Lawngtlai police-te chuan theihtawpin zu tihrêm dan tur an ngaihtuah a, zu siamna hmunte chu kal chilhin an tichhia a ni. Zu siamna hmun tihchhiatnaah hian zu bilh lai zém pakua an tichhia a, zu bilhtute erawh chu an inthiarfihlim hman a ni.

Oil leh gas viltu tur din

Kolasib bawrhsap H Dolianbuaia hoa nimina thuneitute ṭhukhawm chuan tuialhthei leh eirawngbawlna gas dinhmun vil turin 'Common/Helpline leh Monitoring Cell' an din. Bawrhsap chuan, danin a phal bak mimal hnenah tuialhthei leh eirawngbawlna gas hralh a rem loh thu a sawi a; thil dik lo hriate chu phone number 9402173751 leh 8794889303-ah hriattir turin mipui a ngen.

YMA rorel inkhawm

YMA, Zampuimanga Group chuan March 31, Thawhlehni zan khan Kahrawt Branch YMA Hall-ah rorel inkhawm an hmang a, Central YMA aṭangin treasurer H Duhkima leh hruaitu dangte'n an hmanpui. Zampuimanga Group YMA-ah hian branch 14 an awm a, member 2,462 awmin, mipa 1,471 leh hmeichhia 991 an ni. Rorel inkhawmah hian YMA kumpuan 'Ruihhlo do' hawn nghal a ni bawk.

Caregiver course

Lunglei, Champhai, Mamit leh Saitualah nimin khan Social Welfare department leh Mission Foundation Movement ṭang dun buatsaih upate enkawl zirna, Geriatric Caregiver Course zir zo mi 120 hnenah certificate hlan a ni. Geriatric Caregiver Course hi State Action Plan for Senior Citizen (SAPSrC) hnuaia kalpui a ni a; zirlaite thlahna hun hi Mamitah bialtu MLA H Lalzirliana leh Lungleiah Lunglei West bialtu MLA T Lalhlimpuia ten an hmanpui a ni.