Police-in cheng vbc 25.01 hû ruihhlo man

Mizoram Police-te chuan tun hnai khan hmun hrang hrangah Rs 25,01,43,800 (vbc 25.01) hû ruihhlo an man a; chungte chu Rs 9,14,55,800 hû heroin leh Rs 15,86,88,000 hû methamphetamine a ni. Ruihhlo donaah thâ thlah loin theihtawpin hma an lak zel thu Mizoram Police thuchhuah chuan a tarlang.

Aizawl District Special Branch (DSB) team chuan March 31 zan dar 8 khan chuan Zemabawk ṭawngṭai mualah Thanglianmung (26) leh Manglianthang (23), Thinglei, Tidim district, Myanmar nia inchhálte hnen aṭangin heroin gram 104 (hawng 9) an man a; Bawngkawn Police Station-ah NDPS Act leh Immigration and Foreigners Act, 2025 tlawhchhanin thubuai an ziak lut.

Saitual police-te'n March 29, 2026 khan Keifang daiah i10 Grand AR-01 G-9023, Manipur aṭanga Aizawl pana tlan aṭangin heroin gram 242.79 (hawng 20) an man a, car khalhtu Md Eliyach Hussain (46), Palhaji, Barpeta district, Assam an man nghal. Saitual PS-ah thubuai ziah luh a ni.

Keifang daiah tho hian Saitual police-te chuan March 28, 2026 khan Manipur aṭanga Aizawl pan Kia Seltos var, AS-01 EP-1751 aṭangin heroin kg 1.927 (hawng 177) an man a, a neitua puh mi pahnih - Mangminlun (26), Churachandpur North leh Ginlemlal (24), Tuilumjang, Churachandpur district, Manipur te an man bawk.

Saitual police-te vek hian March 27, 2026 zanlai pelh hnu khan Keifang daia Kualmawiah Manipur aṭanga Aizawl pan Bolero Neo MZ-01 AD-6552 aṭangin heroin kg. 2.298 (hawng 200) an man. Car-a chuang Zamchinlam (27), Changlei khua leh Dothanglen (36), Songpi khua, Manipur-a Churachandpur district ve ve lakah NDPS Act tlawhchhanin Saitual PS-ah thubuai ziah luh a ni.

Mizoram Police-a CID (Special Branch) team chuan March 25, 2026 zing dar 9 khan truck MZ-01 F 8402, Seling lam aṭanga Aizawl pan chu Tuirial lei bulah an enfiah a; methamphetamine (Yaba) kg. 19.836 hmu chhuakin an man a; Sig Sauer pistol pakhat, pistol mu 40 leh a magazine pahnih an man nghal bawk.

Meth phurhna truck khalhtu Lalhnehzova (23), Zokhawthar Vengsang chu manin, a lakah NDPS Act leh Arms Act tlawhchhanin thubuai an ziak lut. Meth an man hi Rs 15,86,88,000 hu a nih thu Police thuchhuah chuan a tarlang.