CM Duhoma leh NCC hotu inkâwm

Chief minister Lalduhoma chuan March 30, 2026 khan a pisaah 2 Mizo Battalion NCC commanding officer Col. Sagar K Mohanty a kâwm a; National Cadet Corps (NCC) chungchang leh May 5-11, 2026-a Lungleia NCC Fest & Parasailing Camp buatsaih tur an sawi dun.

Col. Sagar K Mohanty chuan, NCC chungchang hriat zauna tur leh NCC zawm tura ṭhalaite fuih phûrna atan May 5-11, 2026 khian Lungleiah Mizorama NCC Fest & Parasailing Camp hmasa ber tur buatsaih an tum thu a sawi a, "Khua leh tui ṭha ni tura ṭhalaite chher hriam leh mahni inthunun theihna, inrintâwkna leh huaisenna rilru pu tura kaihhruai chu he hmalaknain a tum a ni," a ti.

CM Lalduhoma chuan, Col. Sagar K Mohanty hmalakna chu fakin, Mizoram ṭhalaite hmasawnna atana hmalakna pawimawh tak a nih thu a sawi a, "NCC hi ṭhalaite nungchang siamtu leh hruaitu nihna kawnga chher hriamtu pawimawh tak a ni," a ti a; NCC Fest hmanpui tura a sawmna chu tihhlawhtlin ngei a tum thu leh an hmalakna a phûrpui thu a sawi.

NCC Fest-ah hian sorkar hotu pawimawh leh sipai hotu liante nena inkawmna hun (interactive session) te, NCC chhuak (alumni)-te nena inkawmna hunte a awm dawn. NCC thil leh hriat tur pawimawh pho chhuahna leh Border Security Force, Assam Rifles leh Territorial Army te ralthuam pho chhuahna buatsaih a nih dawn bakah, Mizoram tualchhuak puan, ei leh in leh themthiam thil pho chhuah a ni bawk ang.