Lawngtlai district-a khaw 187-ah Drug Free District kalpui a ni dawn

Lawngtlai district bawrhsap Donny Lalruatsanga hoin nimin khan sorkar laipuiin ruihhlo do beihpui a thlakna, Nasha Mukt Bharat Abhiyam (NMBA) hnuaia District Committee on Drug Free District an ṭhu. Drug Free District hmalakna hi Lawngtlai district-a khaw 187-ah kalpui a ni dawn.

District Drug Free Committee hi NMBA hnuaia din a nih angin hmalakna atana sum senso pawh NMBA aṭanga hmuh tur a ni a; Lawngtlai district-a khaw 187 tuam a ni dawn a, chungte chu Lai Autonomous District Council (LADC) hnuaia khaw 99 leh Chakma Autonomous District Council (CADC) hnuaia khaw 88 a ni.

Drug Free District hmalaknain a tum ber chu - village level-a ruihhlo hman sualna tihreh leh tihbo te, ruihhlo hman sualna vanga pawi khawihna tihtlem leh, NMBA hnuaia certify drug free village-a puante a ni.

Bawrhsap hoa ṭhutkhawmah hian April 10, 2026 khian District Level Drug Free hawn an rêl a; hawn hmain khawpui chhung bikah Village Level Drug Free Committee din ni se, April 20, 2026 hmain thingtlang lamah pawh Village Level Drug Free Committee din vek ni se, an ti.

Drug Free Village puang tur hian khua/vengte chu an veng/khuaah ni 90 chhung ruihhlo hmansual leh zawrh kawngah an fihlim a ngai dawn. District Level Drug Free Committee aṭangin format siamin endik a nih a nih dawn avangin, July 20, 2026 hmain District Level Drug Free Committee-ah Village Level Drug Free Committee-ten ruihhlo awm lohna khua/veng (drug free) an nihna an thehlut tur a ni.

Kumin August 15-a Independance Day-ah drug free village-te puan a ni dawn a; awareness programme hi Sangau RD Block leh Bungtlang South RD Block-ahte kalpui an rel bawk.