Goa Mizote'n Chapchar Kût an hmang

Goa Mizo Welfare chuan March 31, Thawhlehni tlai khan Sneh Banquete Hall, Porvorim, Goa-ah Chapchar Kût an hmang a, Central YMA aṭangin president R Lalngheta leh finance secretary MS Ralte ten an hmanpui.

Goa Chapchar Kût hi Goa Mizo Welfare president Rev. Lalrinsanga'n a kaihruai a, hun hmasa chu Goa-a Mizo awm tharte lawmna (fresher social) anga hmang a ni a, hun hnihnaah Chapchar Kût hman niin, hnam lâm chi hrang hrang entir a nih bakah, zaithiamte an zai a ni.

CYMA president R Lalngheta chuan, Mizo ṭhalai rual, mahni tan leh chhungte hnena pawisa thawn thei eng emaw zat an awm chu Mizo ram leh hnam tan a hlut thu a sawi a, "Ṭhalai rual la rawn kal ve leh zel turte tan ambassador in ni," a ti.

R Lalngheta chuan, Mizo ṭhalaite chu zu leh ruihhlo vanga buai mai mai hman an ni tawh lo tih sawiin, "Zu tamna hmunah pawha zu in ngai lo ṭhalai tam tak in awm avangin Mizo in tihmingṭha a, mi dang tan hnathawh vena tur kawng in hawng zel a ni," a ti a; CYMA Finance Secretary-in thu a sawi bawk.

Goa Mizo Welfare-ah hian member 1,200 chuang an awm a, a tam ber chu hna thawka awm an ni a; member-a inziak lut an awm nual bawk nia thu dawn a ni.