Adviser to CM-in kawng siam mek a tlawh

Adviser to chief minister (technical) H Ginzalala, Champhai North bialtu MLA chuan nimin khan PMGSY hnuaia Champhai Chhangphut Field aṭanga Hmunhmelṭha kaltlanga North Khawbung kawng siam mek a tlawh a, sorkar official-te'n an ṭawiawm.

H Ginzalala chuan, Chhangphut Field - Hmunhmelṭha - North Khawbung kawng chu a pawimawh avangin ṭha taka siam a, siam zawh thuai a duh thu sawiin, "Kawng hmanga sum siamtu ni lo a, sum hmanga kawngpui ṭha leh tlo siam kan zir a ṭul," a ti. MLA hian khawtlang hruaitute leh contractor-te chu inlungrual taka thawkho a, inpuih tawn a ngaihna laiah inphatsan leh insawisel mai lo a, harsatna awmte hmachhawnho zel turin a chah.

PWD Champhai North Sub-Division SDO Hmingthanmawi chuan, kawng siamnaah PWD aṭanga tih turte an tih zel thu leh, contractor-te'n hna an thawh dan leh hmanrua an hmante an vil reng thu a sawi.

Contractor aiawhte'n hna an thawh dan an sawi a; lung an duh ang an hmuh loh thu te, hot mix plant hmanga bungraw changtlung zawka khawih tur a nih avangin, bungraw changtlung zawk thlen hun an nghah mek thu leh, chak zawka hna an thawh theih an rin thute an sawi bawk.