Police-in Rs 4,76,80,000 hù heroin man

Mizoram Police chuan April 1-3, 2026 chhung khan Champhai district chhung hmun hrang hrangah heroin Rs 4,76,80,000 (nuai 476.80) hù an man a, ruihhlo man kaihhnawihah mi pariat manin, police station-ah thubuai an ziak lut.

Champhai police-te chuan April 1 zing dar 8:57 khan Champhai Khankâwna police check gate-ah Ford Titanium car AS-11 M-5555 aṭangin heroin gram 231 (hawng 190 an man a; lirtheia chuang Ashifur Rahman (28) (a khalhtu) leh Jamrul Hoque Khan (26), Karimganj, Assam mi ve ve an man nghal. Heroin kengtute hi Karimganj pan tum an ni a, an lakah Champhai Champhai Police Station-ah NDPS Act tlawhchhanin thubuai ziah luh a ni.

April 1 vêk tlai dar 4 khan Champhai police-te'n Chhungte péngah Kapsuankim (36), Tahan, Myanmar, Khawmawia khawsa mek hnen aṭangin heroin gram 46 (hawng 4) an man bawk a; Champhai PS-ah NDPS Act leh TIF Act tlawhchhanin thubuai an ziak lut.

Zokhawthar police-te chuan April 1 zan dar 9:36 khan Zokhawthar Presbyterian Kohhran biak-in bulah Kenbo bike aṭangin heroin gram 247 (hawng 21) an man a; bike khalhtu Vanlalchhuanga (30), Letpanchhawng, Myanmar, Zokhawthara khawsa mek an man nghal a, bike hnunga chuang erawh a tlanchhe hman thung. Zokhawthar PS-ah NDPS Act leh TIF Act tlawhchhanin thubuai ziah luh a ni.

April 3, 2026 chawhma dar 11 khan Champhai police-te'n Khankawn police check gate-a lirthei an endiknaah Suzuki Ciaz car MZ-01 M-4159 aṭangin heroin kg 1.860 (hawng 160) an man a; car khalhtu Zothangpuia (34), Khawmawi, Myanmar, Zokhawthara khawsa mek leh car-a chuang dang Hawiliankhupa (23), Tongpila, Myanmar, Melbuk khuaa khawsa mek an man nghal.

Ciaz car-a heroin an man an chhui zuinaah, ruihhlo tawlhruknaa inhnamhnawih Lalneihthanga (32), Chekan, Myanmar, Khawmawia khawsa mek leh Lalṭanpuia (36), Chekan, Myanmar, Zokhawthara khawsa mekte an man leh bawk. Champhai PS-ah NDPS Act leh TIF Act, 2025 tlawhchhanin thubuai ziah luh a ni.

Mizoram Police-in heroin an mante hi gram khat Rs 20,000 man leh, hawng khat Rs 232,500 vel man angin an chhût a ni.