MUHCS zawm turin kohhrante'n an ngen

Mizoram Presbyterian Kohhran chuan an kohhran mi, khawsak harsatna vanga Mizoram Universal Health­care Scheme (MUHCS)-a inziak lut thei lote ṭanpui turin tualchhung koh-hrante a ngen a; Mizoram UPC chuan thawktute MUHCS zawm vek turin a chah bawk.

Mizoram Synod chuan, Synod Officers Meeting-in, "Kohhran hoah an kohhran member-te retheihna vanga zawm thei lo, harsa zualte koh-hranin an zawm theihna tura hma laksak tura ngenna siam ni se," tia a rêl thung a tarlang.

Synod chuan March 25, 2026 khan tualchhung kohhrante hnenah lehkha a thawn a, tualchhung kohhran tinte chu an kohhran mi, retheihna vanga MUHCS-a inziah luhna tur nei lote a ṭul anga hma laksak turin a ngen a, "He thil hi mi harsa zawkte inṭanpui theihna kawng a nih avangin a theih anga tihhlawhtlin tum ni se a lawmawm hle ang," a ti.

United Pentecostal Church (Mizoram) pawhin MUHCS an zir chian hnuah zawm ṭha an ti a; an koh­hrana thawk, Mizoram khua leh tui, MUHCS zawm thei zawng zawngte chu MUHCS zawm turin April 2, 2026 khan an chah a ni.

Kohhran pahnih thu­chhuah chungchangah hian Health & Family Welfare minister Lalrinpuii chuan a lawm thu a tarlang a, "Koh­hran lian ber aṭanga thawh­­puina ṭha tak kan dawng hian min tilawm hle a, keini lam pawh hmasawn zel turin kan inbuatsaih sauh sauh e," a ti. MUHCS chu zawm vek tura Mizoram mipui sáwmin, "A mamawhtute'n ṭang­kai taka an chhawr ngei theih nan theihtawp kan chhuah dawn a ni," a ti bawk.