MJA hruaitute'n mawhphurhna an inhlân

Mizoram Journalists' Association (MJA) General Headquarters hruaitu hlui leh tharte chuan April 4, Inrinni khan Aizawl Press Club-ah mawhphurhna an inhlan a, MJA secretary turte ruat nghal an ni.

President kalchhuak C Lalrambuat-saiha'n Vanlalrema Vantawl, editor, Zalen hnenah president mawhphurhna a hlan a; vice president C Lalhmachhuana, editor, Youth Herald-in a nihna ngai a chelh. Treasurer kalchhuak Lalrinmawia Sailo-in treasurer thar Zohmingmawia, news editor, The Aizawl Post hnenah mawhphurhna a hlan bawk.

MJA President tharin secretary turte a ruat nghal a; general secretary atan Vanglaini joint editor K Zothanpara ruatin, secretary atan The Zozam Times news editor H Lalchhandama, ZONET editor Samuel Lalruatsanga leh Entlang editor Lalbiakzama te a ruat a ni.

MJA president thar Vanlalrema Vantawl chuan, India hmarchhak state-a journalist zingah Mizorama journalist-te chu hamṭhatna nei ṭha zingah an tel phâk loh thu sawiin, MJA-in welfare mumal zawk a neih theih nan theihtawp chhuaha hmalak a ṭul thu a sawi a, "Kan welfare lam kan ngaihven ang hian kan eizawnna journalism atana ṭangkai tur workshop leh seminar te kan ngaihven a ṭul. News lamah inel ila, hemi atan plat-form siam pawh kan tum dawn a ni," a ti.