KHAWTHLIR

Thisen pe

April 4, Inrinni khan Civil Hospital, Aizawl tan ṬKP, Ramhlun North Unit-te'n thisen unit 25 an pe a, petute mipa 21 leh hmeichhia pali an ni a; ṬKP, Lengpui Unit pawhin unit 24 pein, petute mipa 23 leh hmeichhia pakhat an ni. Mahnia a thlâwna pe (individual donor) mi 16 an awm bawk.

AR leh sipai báng

Assam Rifles chuan April 4, Inrinni khan Zokhawsanga an hmunah sipai bángte nena inkawmhona hun an buatsaih a; Mizorama Assam Rifles-te hnathawh leh sipai bángte leh an nupui fanaute hamṭhatna chungchangte an sawiho.

DC pisaah chhiarpui

April 4, Inrinni khan Lawngtlai district-ah Chhiarpui 2027 thawh khatna (self-enumeration) ṭan a ni a, Lawngtlai Bawrsap pisaa thawkte zingah ṭan a ni. Chhiarpui ṭan rual hian, video demo leh user manual hmanga self enumeration tih dan zirho a ni a, thil pawimawhte hrilhfiahin, a taka tih chhin a ni bawk.

Harhna champha

Zoram Thar Zofâte Lairêlna Inpui chuan April 4, Inrinni khan Mizorama harhna thlen kum 120-na an lawm. Chawhma dar 10:30-ah Bethel Lungphun, Chaltlangah inkhawm buatsaihin, Zoram Thar hruaitu Rev. Dr Zaichhawna Hlawndo-in a kaihruai a; chawhnuah Zoram Thar Zawlbûk, Zodin Square-ah hun an hmang leh bawk a, Zaichhawna Hlawndo lehkhabu ziah 'Harhna hmasa ber pawchhuaktute chanchin' tih tlangzarh a ni.

Gas tichingpen lai YMA-in man

Central YMA chuan an thu dawn bawhzuiin April 4, Inrinni khan Khamrangah Zopuii Gas Agency-a dah tur gas phur truck chu a khalhtute leh Khamrang mi pahnih inthurualte'n an tichingpen lai an man. Gas tichingpentute chu an zilhhauh hnuah, tih tawh loh an intiam avangin an chhuah leh a; gas tihchingpenna atana an hman gas bur paruk leh an hmanruate erawh an hrêng a ni.