Dan loa leiṭha hralh nia hriat hnenah insawifiah tura hriattirna pek a ni

Mizoram Agriculture, Horticulture and Marketing Cooperative Federation (MAHFED) Ltd chuan thuchhuah siamin, Sihphir leh a chhehvelah Fertilizer (Control) Order, 1985 kalha leiṭha (urea) hralh leh pek chhuahnaa inhnamhnawih nia hriat Zekyl Enterprises laka show cause notice pek a nih thu an tarlang.

MAHFED tarlan dain, Sihphir leh a chhehvelah Fertilizer (Control) Order, 1985 kalhin urea hralh leh pek chhuah a awm thu an dawng a; March 20 leh March 23, 2026 khan MAHFED Managing Director-in a hmunah a enfiah a, leiṭha pek chhuah a nih dan a enfiah bakah, kut hnathawktute a kâwm.

Sorkar chuan leiṭha chu a mamawhtute tan man tlawm zawkin, ip (kg 45 ip) khat Rs 260.40-in a pe chhuak ṭhin a; chutihlaiin, Sihphir leh a chhehvelah ip khat Rs 450 tea hralh a ni. Hei hian Fertilizer (Control) Order, 1985 Clause 3(3) a kalh a, Essential Commodities Act, 1955 hnuaiah hrem theih a ni. Zekyl Enterprises chu inhnamhnawih nia hriat a ni a, Fertilizer (Control) Order, 1985-in a phût lehkha pawimawhte an nei loa hriat a ni.

MAHFED chuan, Zekyl Enterprises hnenah insawifiah tura hriattirna (show cause notice) an pek nghal thu leh thuneitute nen ṭangrualin Zekyl Enterprises-in dan kalha hma a lak tawhnate chhui nghal a nih thu an tarlang a, "Sorkar chuan kut hnathawktute dikna chanvo tihbawrhbànna leh dan kalha chêtna hi uluk takin a vil zui zel dawn a, heng thila inhnamhnawih lo tur leh sorkar lo thawhpui zawk zel turin mi zawng zawng kan ngen a ni," an ti.