Tuialhthei phurh chhuah khap

Lawngtlai district magistrate Donny Lalruatsanga chuan thupek tichhuakin, phalna/storage license nei loa tuialhthei phurh chhuah khap a nih thu a puang a; tuialhthei leh eirawngbawlna gas-ah harsatna a thlen loh nan renchem taka hmang turin district mipui a chah.

Lawngtlai DM chuan, Food, Civil Supplies & Consumer Affairs department thuchhuah leh The Petroleum Act, 1934, Section 7 & 8-in a sawi angin, Lawngtlai district-ah filling station tinte'n mipui nawlpui license neih kher ngai lote tan ni khatah petrol litre 30 leh diesel litre 1,000 (a bûrin) an pe chhuak thei tih a tarlang a; "The Petroleum Act, 2002 Rule 3-in a sawi angin phalna nei lo/storage license nei loa tuialhthei phurh chhuah khap a ni a, Lawngtlai district-ah phalna nei loten an mamawh bak sumdawnna atan emaw, hman tur atan an phur chhuak/kawl khap tlat a ni," a ti.

Phalna nei loa ram dang - Myanmar/Bangladesh-a tuialhthei phurh chhuah khap a nih thu tarlangin Magistrate chuan, thupek zâwm lote chu Bharatiya Nyaya Sanhita, 2023 (BNS) Section 223 leh The Petroleum Act, 1934 Section 23 hmanga hrem an nih dawn thu a tarlang bawk.