KHAWTHLIR

Pump khâr dawn

All Mizoram Petroleum Dealers Association (AMPEDA) chuan April 10, Zirtawpni khian an din champha lawmna leh an pawl inthlan hun an hmang dawn a; hei vang hian April 10-ah nilêngin filling station (pump)-te khar a ni dawn tih an tarlang.

Ruihhlo hâl ral

Lunglei District Disposal Committee chuan nimin khan District Court thuchhuak angin Lungleia incinerator centre-ah heroin gram 51 an hâl a, Rs 18,88,400 hû a ni.

Chhiatnaa hmalak dan tur inzirtir

Saitual District Disaster Management Authoriy chuan nimin khan DC conference hall-ah Saitual Zone Village Disaster Management Committee pualin chhiatrupna a thlen palha chêt lâk dan tur inzirtirna an buatsaih. Aizawl District Disaster Management Authority, Saitual District Quick Response Team leh Village Disaster Management Committee aiawhte an tel a ni.

Work Plan pawm

Serchhip District Programme Advisory Committee chuan an chairman Paul L Khuma, bawrhsap kaihhruaiin nimin khan Annual work Plan 2025-26 an thlirho a, an pawm. Trafficking chungchangah community awareness neih a ni dawn a, elementary school pangaah school support pein, an zirna kaihhnawih atana mamawhte an pe ang. Elementary school tan district huapin Science Fest buatsaih an rêl bawk a ni.

Kangmei ven kawnga hmalakna thlirho

Lawngtlai District Committee on Fire Prevention chu district bawrhsap Donny Lalruatsanga kaihhruaiin nimin khan an ṭhu a; kângmei vênnaa hmalaknate an thlirho a, hmalak tawhnate ṭha an ti. Awareness lamah uar zawka hmalak leh fire hydrant dah belh tura hmalak rêlin, a ṭul angin khapna thupek chhuah nawn leh ni se, an ti bawk.