Larsapin PNB Soldierathon a vailiam

Governor Gen. Dr Vijay Kumar Singh chuan April 5, Pathianni khan Jawaharlal Nehru Stadium, New Delhi aṭangin Punjab National Bank (PNB) din champha vawi 132-na puala PNB leh Indian Armed Forces ṭang dun buatsaih PNB Soldierathon-a tlan turte a vailiam.

Gen. VK Singh chuan, PNB leh Armed Forces ten taksa hriselna atana insawizawi pawimawhzia zirtirna Soldierathon an buatsaih chu ;ha a tih thu a sawi a, "Fit India Campaign hmalakna hnuaiah Soldierathon hi buatsaih a ni a, hemi hmang hian mipui hnenah taksa chak leh hrisel neih pawimawhzia zirtir ṭhin a ni. He thuchah hi kan thehdarh nasat chuan khawtlangin a hlâwkna a tel dawn a ni," a ti.

PNB Soldierathon 2026 hi Operation Sindoor-a tel sipai huaisente chawimawina atan leh Fit India Campaign kaltlanga taksa hriselna ngaih pawimawh a ṭulzia puanzarna atana huaihawt a ni a; thupui chu 'Run for Soldiers' tih niin, mi 27,000 chuang an tlân a ni.