Sorkar thawhpui turin CYLA sáwm

Lawngtlai district bawrhsap Donny Lalruatsanga chuan nimin khan a pisaah Central Young Lai Association (CYLA) hruaitu tharte a kâwm a; Lawngtlai district hmasawnna atan theihtawp chhuaha sorkar thawhpui zel turin a sáwm.

Donny Lalruatsanga chuan, sorkarin ruihhlo do beihpui thlâkna Operation Jericho a kalpui mek leh kawng dangah ṭhahnemngai taka sorkar thawhpui turin CYLA hruaitute a sáwm a; ruihhlo donaah CYLA hnuaia Drug Reduction Squad (DRS)-te chak zawka hma la zel tura a beisei thu a sawi.

CYLA president F Lalrothanga chuan, Lawngtlai district hmasawnna turah CYLA chu an tlanchhe dawn lo tih sawiin, ṭha taka sorkar an thlàwp tur thu a sawi a; Central Executive Commitee ṭhutkhawm hunah hmalakna tur hrang hrangte rel a nih tur thu a sawi bawk.