Lokayukta Report Governor-ah thehlut

Mizoram Lokayukta chairman C Lal­sawta, IAS (Rtd) chuan Mizoram Lok­ayukta-in kum khat chhunga hna a thawhte chhinchhiahna Annual Report 2019-20 chu nimin khan Raj Bhavan-ah Governor PS Sreedharan Pillai hnenah a thehlut. 

Governor chuan, Mizoram Lok­ayukta-a thawktute chu eirûk dona kawngah theihtawp chhuah zel turin a chah a, "Mipuite'n Mizoram Lokayukta ṭangkai taka kan hman theih nan mipui hnenah inzirtirna nasa zawka inpek a ngai a ni," a ti.

Sorkar thuchhuah tarlan danin, Lokayukta chairman C Lalsawta hi March 11, 2019 khan lâk luh a ni a, thawktu 27 awm mekin, Temple Square-a F Kapsanga in an luah a ni. Director pahnih ruatin, hun rei lo têah Inquiry Wing leh Prosecution Wing hawn tum a ni.

Record hnuhnung bera tarlan danin, Mizoram Lokayukta hian complaint 24 a dawng tawh a; chu'ng zinga case pali chu khâr a ni tawh. Hearing vawi hnih neih a ni tawh a, hearing vawi riat la neih tur atan pawh a hun leh níte ruat a ni tawh bawk.