IGNOU-in convocation an hmang

Indira Gandhi National Open University (IGNOU) chuan nimin khan India rama regional centre 39-ah zirlai zir zote thlahna leh certificate hlanna, Convocation vawi 39-na an hmang a; IGNOU Regional Centre, Aizawl aṭangin mi 1,200-in degree/certificate an nei thar.

IGNOU convocation vawi 39-naah hian ram pumah mi 3,13,770-in degree/certificate an dawng. Regional Centre, Aizawla zirlai 1,200 hnenah degree/certificate hlan a ni a; chungte chu master degree nei thar mi 501, bachelor degree nei thar mi 624, postgraduate diploma pahnih, diploma 12 leh certificate programme learner mi 49 an ni.

IGNOU Convocation hi New Delhi-a IGNOU hmunpuiah India vice president CP Radha-krishnan hoin hman a ni a; Regional Centre, Aizawl aṭangin NIT, Mizoram director Prof. Dr S Sundar hoin zirlai leh zirtirtute'n video conferen-cing hmangin an chhim.

Aizawla convocation hmanpuitu Prof. Dr S Sundar chuan, zirlai degree/certificate nei tharte chu an thiamna leh theihnate tipung a, India ram hmasawn zel nan theihtawp chhuah turin a chah.

IGNOU Regional Centre, Aizawl regional director Dr SR Zonunthara chuan, Aizawl Centre-in Mizoram district tinah zirna-in behchhanin Learner Support Centres a neih thu a sawi a; SWAYAM Prabha hnuaiah live counselling leh academic broadcasting tih theihna tur digital studio an neih thar thu a sawi bawk.