Chhiarpui 2027-ah Larsap inziak lut

Governor Gen. Dr Vijay Kumar Singh chu nimin khan Lok Bhavan-ah Chhiarpui 2027 (Census of India 2027) thawh khatna hnuaia self-enumeration-ah a inziak lut. Governor chuan, chhiarpui a awlsam zawk theih nan village council leh local council-te nena thawh dunna ngai pawimawh turin chhiarpui buaipuitute a chah.

Larsap chuan, India rama digital census hmasa ber kalpui a nih mek chu lawmawm a tih thu sawiin, "Chhiarpui hi Mizoramah hlawhtling taka neih a nih ngei theih nana theihtawp chhuah a ṭul," a ti. Chhiarpui buaipuitute chu an hnathawh a awlsam zawk theih nan VC leh LC te nena thawh dunna ngai pawimawh turin a chah a; chhiarpuia inziak lut ṭheuh tur leh official-te ṭha taka ṭawiawm turin mipui a sáwm.

Gen. VK Singh chuan thingtlang kilkhawr bera chengte thlenga hmaih awm lo tura fimkhur tur te, mipuite'n harsatna an tawh loh nan a awlsam thei ang berin chhiarpui kalpui tur te, hriatthiam loh a awm loh nan ṭan la turtein chhiarpui buaipuitute a chah bawk.

Census Operations director Vinod P Kavle, assistant director Shivam Gupta leh Sandip Panja bakah, principal census officer Joseph H Lalramsanga leh GAD additional secretary leh additional state nodal officer ni bawk Irene Zohlimpuii Chongthu ten Governor hnenah hian Mizorama chhiarpui kalpui dan tur tlangpui leh hmalak tawhna leh hmachhawpte an hrilhfiah a ni.

Chhiarpui hi thawh hniha kalpui tur a ni a; a thawh khatna - houselisting & housing census chu April 1, 2026-ah ṭan a ni. Self-enumeration atan April 1-15, 2026 chhung hun hawn a ni a, April 16 - May 15, 2026 chhungin houselisting & housing census tih a ni dawn. A thawh hnihna - population enumeration chu February 2027-ah ṭan a ni ang.