Champhaiah project 3 lungphùm phúm

Tourism leh Sports & Youth Services department enkawltu minister Lalnghinglova Hmar chuan nimin khan Champhaiah Heritage & Cultural Center, Eco Resort Experience at Keilungliah leh Construction of Artificial Turf lungphùm a phúm.

Champhai Vengsanga Heritage & Cultural Center leh Keilungliaha Eco Resort Experience hi Tourism department hmalakna niin, Swadesh Darshan 2.0 hnuaia mi a ni a; New Champhai khelmuala phullem phah tur chu Ministry of Tribal Affairs hnuaia PMJVK scheme hmanga Sports & Youth Services department hmalakna a ni.

Lalnghinglova Hmar chuan, lungphùm phùmte chu sorkar hmalakna ni mah se, a hlâwkna têltu tur chu mipui an nih thu sawiin, "Community based tourism kalpui zel kan duh a, a enkawl leh venhim kawngah mipui puihna kan mamawh. Champhaiah hian District Tourism Office hawn a ni dawn a, Champhai Tourist Lodge pawh siamṭhat a ni dawn," a ti a; mikhual dawnsawn dan zir belh zel turin mipui leh khawtlang hruaitute a chah.

New Champhai khelmuala phûllem phah tur chungchangah Lalnghinglova chuan, "Inkhel hmuhnawm tak tak buatsaih a nih ngei ka beisei," a ti a; ṭha taka enkawl turin Champhai District Football Association leh khawtlang mipui a sáwm.

Lungphùm phùmna inkhawm hi Champhai Kahrawt Venga Thangtea Hall-ah neih niin, Tourism director R Lalrodingi'n a kaihruai a; Champhai bawrhsap Mohammad Aaquib pawhin thu a sawi.