Khawzawlah DPRC pisa leh hostel hawng

Rural Development & Administration minister Prof. Lalnilawma chuan nimin khan Khawzawla District Panchayati Resource Centre pisa leh hostel thar a hawng a; Khawzawl district-a VC pali hnenah computer a hlan bakah, The Mizoram (Village Councils) Act, 2025 a tlangzarh bawk.

Prof. Lalnilawma chuan, VC-te thiamna leh theihna tihchakna tura training an neihna tur DPRC pisa leh hostel building ṭha tak hawn a ni ta chu mipui tana ṭangkai tur a nih thu a sawi a, "VC-te an inthuam chak theih nan leh khawtlang tan ṭha zawka hna an thawh theih nan VC dan thar, The Mizoram (Village Councils) Act, 2025 siam a ni. 15th Finance Commission hnuaia LAD tana fund kum thum chhung kan dawn loh pawh kum khat chhungin kan nawr chhuak a, LAD, Directorate of Local Fund Audit leh PHE te inkara thawhhona a ṭhat vang a ni," a ti.

16th Finance Commission-in VC-te'n an mamawh inphuhrûk thei tura mahnia sum an hai luh theih (own source of revenue) a ngaih pawimawh thu sawiin Lalnilawma chuan, VC hruaitute chu chutiang tura ngaihtuahna seng turin a chah. National Panchayat Award 2025-a Clean & Green Panchayat category-a India ram pumah Kawrthah North VC pakhatna a nih avangin a lawm thu a sawi bawk.

Inkhawm hi Khawzawl district bawrhsap K Vanlalṭhiana'n a kaihruai a; RDA additional secretary V Lalengmawia, LAD director Dr Lalngura Tlau, project director K Lalhmuakliana leh Khawzawl SP F Lalbiakzauva bakah, All Mizoram VC Association hruaitu te, Khawzawl district-a VC hrang hrang aiawhte leh sorkar hotute an tel a ni.