Mizoramah bungrua phur lo turin MTOA-in hnam dangte an hriattir
Mizoram Truck Owners' Association (MTOA) chuan January 12, 2021 aṭang khan hnam dang truck, Mizoram aṭanga bungraw phurte an dang a, ti tawh lo turin an hriattir.
MTOA hruaitute chuan, hnam dang truck-in an chaw bél an chuhpui avangin Chief Minister leh Chief Secretary hnenah hnam dang truck-te Mizorama bungraw phurhtir tawh lo turin an thlen tawh thu Vanglaini an hrilh a, "Sorkar thuneitute hnenah ṭum eng emaw zat kan thlen a, hmalakna a awm si loh avangin kan thiam danin hma kan la ve a ni," an ti.
Inter state-a hnam dang truck-te'n bungraw an phur chu an ngaimawh lo tih sawiin MTOA hruaitute chuan, "Truck-te hian state chhungah erawh chuan bungraw phurh hi kan hauh far a, kan inzahsak ṭhin," an ti a; Mizoramah chuan Chief Secretary-in hnam dang truck backload lâk phal lohna order chhuah mah se, zawm a hlawh loh thu an sawi.
MTOA hruaitute chuan, kuhva rah hmanga sumdawngte'n Champhai aṭanga Vairengtea dah turin hnam dang truck an hmang tlat zel tih sawiin, "Krismas hma deuh khan kan meeting pui a, Mizo truck chauh hmang tawh turin inremna kan ziak. Mahse, kan hming ziahna pen tui pawh a la hul ang em tih laiin kan inremna chu rawn bawhchhiain, vai truck bawk chu an hmang leh nghal a ni," an ti.
MTOA hruaitute sawi danin, kar hmasa khan hnam dang truck Mizorama lutte chu an lêt lamah bungraw phur tawh lo tura hriattirna, Hindi-a ziah an pe vek a ni. MTOA hian January 12, 2021 aṭang khan Rangvamuala an site office-ah an duty a, hnam dang truck Mizoram aṭanga bungraw phurte chu pawisa an chawitir bakah ti tawh lo turin an hriattir. Hnam dang truck hi 100 vel nimin tlai thleng khan an lo tiding tawh a ni.