Sorkar hnathawk tan training buatsaih

Administrative Training Institute (ATI), Aizawl chuan nimin khan Lunglei, Siaha, Lawngtlai leh Hnahthial district-a sorkar hotute pualin Lunglei BCM Hall-ah office enkawl dan leh sum vawn dan zirhona, Special Training on Functional Efficiency in Establishment and Accounts Matters' an buatsaih.

Training hmanpuitu Lunglei bawrhsap Navneet Mann chuan, sorkar hnathawkte chu sorkar ṭha siamna atana hmanraw pawimawh an nih thu leh ṭha taka hna thawk thei turin tunlai hmasawnna mila intah hriam reng a ṭul thu a sawi a, "Sorkar laipuiin iGOT Karmayogi kaltlangin sorkar hnathawkte'n an thiamna an tihpun leh an tah hriam zelna tur ruahmanna a kalpui a, chumi tihhlawhtlinna peng khat atana ATI-in sorkar hnathawkte thiam tur pawimawh hrang hrang zirhona an buatsaih hi a lawmawm," a ti.

Training hawnna inkhawm hi ATI director Rita Lalnunmawii Pachuau-in a kaihruai a; sorkar hnathawk Lunglei district aṭangin mi 80, Siaha district aṭangin mi 21, Lawngtlai district aṭangin mi 30 leh Hnahthial district aṭangin mi 25 an tel a, vawiinah chhunzawma zawh a ni ang.