KHAWTHLIR

Thisen pe

KṬP, North Vanlaiphai Damdawi Veng Bial chuan nimin khan an hmunah thisen pek an huaihawt a, Serchhip District Hospital tan thisen unit 54 an pe a, petute mipa 47 leh hmeichhia pasarih an ni.

Kawng kam endik

Lawngtlai district bawrhsap Donny Lalruatsanga hoin nimin khan District Road Safety Committee an ṭhukhawm. Lawngtlai khawpui kawng sira in sakna bungrua leh thil dang dahte chu mumal taka kaihhruaina (terms & conditions) siam a, District Magistrate hnenah phalna dilna tur siam an rêl a; Road Protection Squad-te'n thla khatah vawi khat tal endik ṭhin se, an ti bawk.

Bank hnathawh endik

Champhai District Consultative Committee, District Level Review Committee leh District Level Security Committee chu chairman Mohammad Aaquib, district bawrhsap hoin nimin khan an ṭhu a; October - December, 2025 chhunga Champhai district-a bank-te hnathawh dan leh hmalaknate an endik. Bawrhsap hian Potential Linked Credit Plan 2026-27 a tlangzarh bawk.

MSU Cup final

Mizo Students Union-in MSU Cup 2026 an buatsaihah nimin khan Armed Veng Firld-ah final khelh a ni a, Hrangbana College-in J Thankima College hnehin an champion. Kharna inkhawmah MSU president B Lalkhawngaihzuala chuan, sorkarin zirtirtu aikal tihtawp tuma theihtawp a chhuah chunga zirtirtu 14-in aikal an la la chu an hriatthiam loh thu leh, aikal late chu dan anga hrem an nih theih nan hma an lak thu a sawi.

Hriselna Kût rêl

Serchhip district bawrhsap Paul L Khuma kaihhruaiin nimin khan Nasha Mukt Bharat Abhiyan District Level Committee chuan NMBA hnuaia hmalakna peng pakhat atan ‘Hriselna Kût - Health Camp’ buatsaih tura hmalak dan tur an rêl a; Hriselna Kût buatsaih dan tur an ruahman. Hriselna Kût hi kumin May thla chawhma lamah DC pisa tualah buatsaih tum a ni.