KHAWTHLIR

Mizorama sikul leh hostel zawng zawngte chu thuchhuak thar a awm leh hma chuan khâr vek tura tih a ni. Hemi chungchangah hian School Education director James Lalrinchhana chuan nimin khan thupek (order) a chhuah a ni.

Dinthar Branch YMA Committee Room thar chu nimin khan bialtu MLA Lalruatkima, minister of state-in a hawng. Dinthar YMA Committee Room thar hi September 8, 2020-a sak ṭan a ni a, a sak nan cheng nuai 9.6 vel hman niin, bialtu MLA-in MLALADS aṭangin Rs. 5,46,500 a thawh a ni. 

State Referral Hospital-ah Covid-19 vei mi 14 an awm mek a, an zingah kum 60 chung lam pathum an tel. SRH-ZMC Bulletin tarlan danin, mi 14-te chu Isolation ward-ah enkawl an ni a, an zinga panga chu oxygen pek mek ni mah se, ngaihtuahawm lutuk an awm lo.

Aizawl South-I bialtu MLA C Lalsawivunga chuan nimin khan a bial chhunga Venghlui Indoor Stadium-a hman turin Venghlui Games & Sports Association hnenah tui dah vawhna (water cooler) a hlân. 

Committee on Utilization of Chief Minister’s Relief Fund for COVID-19 rorel ang leh Chief Minister phalnain CM Relief Fund aṭangin January 13, Nilaini khan Rs. 34,13,487 pek chhuah a ni. Sorkar thuchhuah tarlan danin, CM Relief Fund hi Lalramdina Parte (L), Khatla ràlna atan Rs. 1,00,000, CCC atana Saitual District Jail hmanna senso atan Saitual DC hnenah Rs. 1,01,750 leh ZMC-a Covid-19 veite damdawi leina leh enkawlna atan Rs. 32,11,737 pek a ni.

Covid-19 No Tolerance Drive-a duty tura ruat sorkar hnathawk, Covid-19 Executive Duty-te chu Mizoram sorkar chuan an thawhna department-ah ṭheuh an hna pangngai thawk leh tawh turin a chhuahtir tih, nimin khan sorkar thuchhuahin a tarlang.