Best Organisation Award dawn lawm

Nimin khan School Education minister Lalchhandama Ralte hoin a pisaah School Education department-in 65th National School Games-a boxing U-17 boys-a Best Organisation Award-a pahnihna a dawn chu lawm a ni.

Lalchhandama Ralte chuan, Mizoramin National School Games Boxing U-17 (Boys) a thlenah Best Organisation Award pahnihna an dawng chu department-a thawktute ṭan rualna leh inpekna leh department dangte nena an ṭanhona rah a nih thu a sawi a, "Kan tualcharah Mizo naupangte'n hnam dang naupang duh tâwkin an hnek a, overall champion kan ni thei kha a ropui hle a ni," a ti. 

November 19-22, 2019 khan Mizoram sorkara School Education department chuan 65th National School Games Boxing U-17 (Boys) a thleng a; School Games Federation of India chuan performance report chi hrang hrang a dawn aṭangin tun hnaia SGFI Annual General & Election Meeting, Tamil Nadu-a neihah Mizoram chu Best Organisation Award second position atan a thlang a ni.