Tri Services Veterans Day hman a ni

Nimin khan Mizorama a ṭum khatna atan Mizoram Home Guards & Civil Defence hmunpui, Chawlhhmunah sipai bángte hriatrengna ní, Tri Services Veterans Day hman a ni a, Home minister Lalchamliana’n a hmanpui.

Tri Services Veterans Day hi India ramah kum 2017 khan hman ṭan a ni a; khawmual, lawng leh thlawhna sipai pension (veteran)-te puala hman ṭhin a ni. India mi, khawmual sipai hotu lu hmasa ber Field Marshal KM Carriappa, OBE pension ní, January 14, 1953 chu sipai báng pension-te hriatrengna ní atan hman tura rêl a ni.

Lalchamliana chuan, Mizoram hruai hnaah sipai bángte'n kawng tinrengin pawimawhna an neih ṭhin thu te, Mizoram khawtlang tan an thawh hlâwk thute sawiin, chu'ngte chu chhawm nung zel turin a chah. Home Minister chuan, ex-servicemen-te'n harsatna an tawh ṭhin a hnenah an thlen chungchang sawiin, "Hripui léng vangin sum leh pai a harsa a, duh angin hma a lak theih lo a, sum dinhmun a ṭhat huna Mizoram police lak turah ex-servicemen-te leh Home Guard-te tan 5% ve ve hauhsak a ni dawn," a ti.

Tri Services Day hmanna inkhawm hi Mizoram Ex Services League (MESL) buatsaih a ni a, mi hrang hrangin thu an sawi. MESL-ah hian member 6,515 an awm mek a ni. Kum tin Mizo sipai 40-70 vel pension-in an chhuak ṭhin a, an zinga 1,000 vel chu hna la thawk thei (reemployed theih) an ni a, Mizoram sorkarah sipai pension mi 135 velin hna an thawk mek a ni.