Lungleia bank-te hmalakna sawiho a ni

Nimin khan Lunglei DC Conference Hall-ah District Consultative Committee/District Level Review Committee/District Level Security Committee an ṭhu a, Lunglei additional DC R Vanrengpuia'n a kaihruai. Sorkar kum kal meka September 2020 thlenga Lunglei district-a bank-te hmalakna thlirho a ni.

Ṭhutkhawma an tarlan danin, Lunglei district-a bank-te'n sum an dawn (deposit) aṭanga loan an pek chhuah zat tehna, Credit Deposit Ratio (CD Ratio) March 2020-ah 53.22%, April-June, 2020-ah 44.61% leh July-September, 2020-ah 47.06% a ni. National benchmark 60% an phâk loh avangin, pha tura ṭan la turin bank-te chu chah an ni.

Prime Ministers Employment Generation Programme (PMEGP)-ah April-September, 2020 chhungin Lunglei district-ah loan cheng nuai 38.91 pek chhuah a ni a; National Rural Livelihood Mission (NRLM) hnuaiah self help group panga hnenah loan cheng nuai 12 pek chhuah niin, DAY-NULM hnuaiah mi 34 hnenah loan cheng nuai 43.67 pek a ni bawk.

Sorkar laipui hmalaknaa khawpuia chêngte in sak ṭanpuina Pradhan Mantri Awas Yojana (PMAY) hnuaia housing loan pekah bank ṭhenkhatin an tih ṭhat viau laiin, bank ṭhenkhatin ṭan an lak a ṭul thu an sawi. Pradhan Mantri Jan Dhan Yojana (PMJDY) hnuaiah Lunglei district-ah hamṭhatna dawngtu mi 54,553 an awm mek a; Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) hnuaiah mi ziah luh belh zel a ni.

Ṭhutkhawmah hian Lungleia lead bank manager Lalhlupuii, RBI manager Dhrubajyoti Das, bank manager-te leh line department hrang hrang aiawhte an tel.