AMC inthlana vote thlak tura nihna tichiangtu atana hman theih tichhuak

State Election Commission (SEC) chuan April 21, 2026-a Aizawl Municipal Corporation (AMC) inthlana vote thlaknaa mahni nihna finfiah theihna (identity proof) turte a tarlang. Polling station-ah mobile phone ken luh khap a nih thu a tarlang bawk.

SEC-in vote thlakna atana lehkha pawimawh (document) a tarlante zinga a eng emaw ber hman theih a ni a; SEC chuan, "Heng document-te hmang loa vote thlaktir an awm a, vote inthlaksak leh thil dik lo hmuh chhuah a nih chuan presiding officer leh polling officer ten mawh an phur ang," a ti.

Vote thlak tura mahni nihna tichiangtu atan hian voter identity card, Aadhaar card, passport, driving license, PAN card, passbook, hnathawhna ID, student ID te hman theih a ni a; ID hman theih dang eng emaw zat a awm bawk.

SEC tarlan danin, polling officer, candidate, election agent, polling agent leh mipui (voter) ten vote thlak ni-ah vote thlakna hmun (polling station)-ah phone an ken luh khap a ni a; presiding officer-te chu poll day report an pek a ngaih avangin mobile phone an ken luh phal a ni thung.

Vote chhiar ni-ah vote chhiarna hmun (counting hall)-ah election observer, district municipal election officer, assistant district municipal election officer, municipal returning officer leh assistant municipal returning officer te phone ken luh phalsak an ni ang.