Hnahsin Kût kalpui zel dan tur sawiho

April 7, Thawhlehni khan Tourism minister Lalnghinglova Hmar hoin Champhaiah Tourism department, Champhai Nature Conservancy (CNC), Champhai North Joint VC leh NGO hrang hrang aiawhte'n Hnahsin Kût kalpui zel dan tur leh kût lian chho zel dawnsawn dan tur an sawiho.

Tourism Minister chuan, Champhai khawtlang leh mipui ṭangrualin Mizorama kût lian ber pakhat an buatsaih thei tih sawiin, "Mizoram chhung leh pawn aṭangin Hnahsin Kût chhim tur an lo la kal belh zel dawn. Mikhual dawnsawn kawngah Champhai khawpui inpuahchah a ngai a, a bikin tourism kaihhnawiha eizawngte uar zawka zirtir an ngai" a ti.

Champhai district chu pipute hmun pawimawh tamna a ni tih sawiin Lalnghinglova Hmar chuan, "Hnahsin Kût hmanga Champhaia tlawhtute'n district chhung hmun danga tourist hmun ṭha tak takte an tlawh tel theih nan ngaihtuahna sen ṭul. Hnahsin par leh Champhai district mawina behchhanin Hnahsin Kût kalpui dan her rem hret theih niin a lang," a ti a, Champhai khawtlang hruaitute'n rawtna an neihte ngaithla tura kal an nih thu a sawi.

Ṭhutkhawmah hian Hnahsin Kût buatsaih tawh dana hmasawn ngaihna lai leh tihmasawn tura rawtna awmte sawiho a ni. A bul ṭan nan Champhaia tourism kaihhnawiha eizawng, a bikin homestay, hotel leh restaurant neitute leh tour guide-te chu June 2026 hmain Tourism department-in training pe se an ti.

CNC-in a ngen tawh angin, Hnahsin Kût buatsaihnaa thawhho dan tur pawh Tourism department hotute leh CNC aiawhte'n sawiho nghal. Sum leh fai hautak zelah, ‘community-based festival’ a nihna bo si loin sorkar nen mumal zawka thawhho dan tur ngaihtuah a ni a; sorkarin festival a buatsaih dan kalphungte sawiho a ni bawk.