Road Safety Month hman tur sawiho

Mizoram State Road Safety Council (MSRSC) chu nimin khan an chairman TJ Lalnuntluanga, Transport minister hoin Transport directorate conference hall-ah an ṭhukhawm a; kumin January 18 - February 17 chhunga Road Safety Month hman dan tur an sawiho.

TJ Lalnuntluanga chuan, kum dangah chuan January thlaah Road safety Week hman ṭhin a nih thu sawiin, "Kuminah chuan Ministry of Road Transport & Highways-in January 18 - February 17, 2021 inkara hman turin ruahmanna a siam a ni," a ti.

Transport Minister chuan, India ramah lirtheia chetsualnaah kum tin mi 1,50,000 vel an thi ziah anga chhut a ni tih sawiin, "Mizoramah pawh lirthei a pung chak em em a, lirthei khalhtu, lirthei neite leh mipuite'n fimkhurna tur leh zawm tur kan neihte kan hriat chian a ṭul," a ti a; Road Safety Month hman chhungin nasa lehzuala inzirtirna kalpui a ṭul thu a sawi.

Ṭhutkhawmah hian, Road Safety Month chhungin Transport department leh traffic police ṭangkawpin district khawpui zawng zawnga hmun lûn laiah mipui ṭanpui nan leh an hriat duh zawngte zawhfiah theihna tur Help & Guidance Desk siam an rel a; fimkhur tura mipui zirtir nan district khawpui kawtchhuah, khawpui chhung kawtthlêr leh lirthei zuartute dawrah road safety banner târ ni se, an ti.

Zirna-inte hawn a nih hunah lirthei laka fimkhur tura intiamna (Road Safety Pledge) chham turin an rel a; sorkar pisa zawng zawngah pawh chham turin an ti bawk.