Champhai, Khawzawl leh Saitual district-ah March 2026-ah nuai 3,323.25 hû ruihhlo man

Mizoram Police chuan March 2026 chhung khan Mizoram khawchhak lama district pathum - Champhai, Khawzawl leh Saitual district-ah Rs 33,23,25,150 (nuai 3,323.25) hû ruihhlo chi li an man a; ruihhlo kaihhnawihah mi 18 an man bawk.

Police thuchhuah tarlan danin, Mizoram Police-in March thla chhunga Myanmar lam hnaih district pathuma ruihhlo an man tam ber chu methamphetamine niin, kg 15.28 a ni a, Rs 12,21,20,000 hû a ni. Meth man kaihhnawihah mi panga manin, India mi pathum leh ram dang mi pahnih an ni a, thubuai pathum an ziak lut.

Heroin kg 5.15396 an man a, Rs 10,30,79,200 hùa chhût a ni a; a kaihhnawihah mi 10, India mi paruk leh foreigner pali an man a, thubuai pakua an ziak lut. Rs 10,68,50,000 hû morphine kg. 10.685 an man a, mi pahnih man telin, thubuai pakhat an ziak lut. Mi pakhat hnen aṭangin Rs 2,75,950 hû ganja kg 5.519 an man bawk.

Police-te'n March thla chhunga Mizoram Police Eastern Range huam chhunga ruihhlo an man zawng zawng hi Rs 33,23,25,150 hû a ni. A kaihhnawihah thubuai 14 an ziak lut a, mi 18 manin, India mi 12 leh ram dang mi paruk an ni.

Champhai, Khawzawl leh Saitual district-a March thla chhung ringawta ruihhlo tam tham tak man a ni chuan ruihhlo donaa police-te hmalakna leh thawhrimna chiang taka a lantir thu leh, nasa lehzuala ruihhlo dona a ṭulzia a lan thu Police thuchhuah chuan a tarlang.

Mizoram Police chuan, ruihhlo leh dan phal loh thil donaah thâ thlah loin theihtawp an chhuah zel dawn tih sawiin, "Kan ram leh hnam himna tura sorkar, VC, YMA leh NGO hrang hrang ṭanghoin ruihhlo do beihpui kan thlaknaah min dopui turin Zoram mipui kan sawm tak zet a ni," an ti a; misual leh ruihhlo tawlh hriate chu thuneitute hnena thlen zel turin an ngen a ni.