AMC-ah ZPM kan sorkar chuan chhiah lâkte ṭangkai taka hman a ni dawn - Lalthansanga

Aizawl Municipal Corporation inthlan tur pualin ZPM party chuan nimin khan Aizawla veng hrang hrangah street campaign an buatsaih a; thusawitu minister Lalthansanga chuan, AMC-ah ZPM an sorkar a nih chuan AMC-in chhiah a lakte mipui tan ṭangkai taka hman a nih tur thu a sawi.

Lalthansanga chuan, ZPM sorkar hnuaiah mipuite'n an chanvo dik tak an chang mek zel nia sawiin, "Sorkar hmasa lamah chuan mipuite'n chhiah pek kan hreh ṭhin a, ZPM sorkarah chuan mipuite chiah pek dik taka kan hman avangin mipui an lawm a, electric bill mipuiin an pek pawh dik taka hman a nih avangin rebate (lawmman) cheng vbc 700 chuang kan dawng tawh. Road cess kan lak pawh dik taka hmangin, kawngpui ṭha zawk kan siam mek a ni," a ti.

Chhiah lakte dik taka hman chu AMC-ah pawh ZPM an sorkar a nih chuan an kalphung tur a nih thu sawiin, "AMC-in chhiah a lakte dik takin a hmanna turah kan hmang dawn a, mipui tana ṭangkai turah kan hmang zel ang," a ti a; ZPM candidate-te thlang tling turin Aizawl mipui a ngen.

Ministeer of state B Lalchhanzova pawhin thu sawiin, AMC chu sorkar hmasate'n an duhsak zawngte contract pekna ang velah an suih tê zo niin a sawi a, "AMC hi mipui phurrit thlentu tur ni loin, khawpui nuam, him leh eizawn awlsamna, dan lalna hmun a ni tur a ni a, rethei berte pawhin an chanvo an chan theihna a ni tur a ni," a ti.

Hun hmasa lamah AMC sum hmuh leh hman dan a langtlang tâwk lo tih sawiin B Lalchhanzova chuan, "ZPM corporator-te erawh chuan an sum hmuh ang an hmang ṭhain a langtlang hlawm hle. ZPM khawpui sorkar a ding a nih chuan sum hmuh leh hman te langtlang taka kalpui tur a ni a, mipui thlim zawngin hmalak a ni lo ang," a ti a; ward committee kaltlanga hnathawh zel a nih tur thu leh khawpui fai leh mawi din turin theihtawp an chhuah dawn thu a sawi.

Street campaign-ah hian MLA pahnih TBC Lalvenchhunga leh T Lalhlimpuia bakah, corporator tura ZPM candidate-te pawhin thu an sawi a ni.