Ṭhelrêt chìn chungchang sawiho

Rubber & Allied Crops Development Board chu an chairman R Lalzirliana, minister hoin nimin khan a pisaah an ṭhukhawm a; Board hmalakna te, ṭhelrêt chungchang leh thlai dang chíngtute tana ruahmannate an sawiho.

Meeting chuan, Ministry of Commerce & Industries leh NABARD-te nen ṭanghoa Mizorama ṭhelrêt  chìnna (rubber plantation) tihhmasawn dan tur sawihoin, ṭhelrêt chìnna atan ram hectare 15,000-a zauah hmalak tum a ni. Ṭhelrêt kûngte an hnài theih hmaa a chíngtute intun nun nan Automative Tyre Manufactureres Association (ATMA) chuan ṭanpuina an pe ang.

Ṭhelrêt chìnna atan hian NABARD chuan ram hectare khatah 7% pung awmin loan Rs. 3,00,000 a pe thei dawn a, interest 7%-a a zatve 3.5% chu ATMA-in a tumsak dawn a ni. Ṭhutkhawmah hian SEDP hnuaia kuhva chìnna atan Rs. 75,00,000 pek chhuah a nih thu tarlan a ni a, sum chu kuhva tipuitling tur tak tak, mi taima leh thawkrimte'n an dawn theih nan a dawngtu tur thlan kawngah fimkhur takin kalpui a nih tur thu tarlan a ni bawk.