MSU-in college exam chungchang sawipui

MSU hruaitute chuan nimin khan Mizoram University registrar Prof. Lalnundanga an hmu a, college zirlaite online hmanga an exam chungchanga felhlel awm te, harsatna tâwkte leh zirlaite exam kalphungte an sawipui.

Prof. Lalnundanga chuan, online hmanga college exam chu Mizoram College Teachers' Association, College Principals' Council, MZU Students' Council, RIPANS, DIET, college students union leh MZU Controller of Examinations ten an ngaihtuah hnuah uluk taka kalphung duangin kalpui a nih thu a sawi.

MZU Registrar chuan, exam-na atana software hman tur chu uluk taka thlan a nih thu leh zirlai sing chuang exam felfai taka dawng zo tur an hman thu a sawi a; exam dan turah enchhinna (demonstration) ṭha taka neih lâwk a nih thu sawiin, "Harsatna leh technical problem awm theite pawh zirtirtute hrilh lâwk vek an ni," a ti.

MSU-in practical exam neih ngai - B.Ed., M.Ed., science practical, nursing leh a dangte bakah, Mizoram chhung leh páwna zirlai awmte tan practical exam neih theih dan tur ngaihtuah tura an thlen chungchangah MZU Registrar chuan, ruahmanna an siam tawh thu a sawi a ni.