Ni chakna hmanga tui lâkna hawng

Phairuangkaia Nûlzau Minor Irrigation Project-a ni zung chakna hmanga tui lâkna siam chu nimin khan Irrigation and Water Resources (IWR) minister C Lalrinsanga'n a hawng.

Solar energy hmanga tui lâkna hawn puala Phairuangkaia inkhawm, IWR chief engineer Lalrotluanga kaihhruaiah C Lalrinsanga chuan, ni zung chakna hmanga nasa zawka kut hnathawktute'n hma an sawnna tur ruahmanna siam mek a nih thu a sawi.

C Lalrinsanga chuan, kawlphethain a thlen phâk lohna hmun thingtlang khuaah thlai tharte dahṭhatna cold storage bun turin ni zung chakna hman ṭangkai tum a nih thu a sawi a; Agriculture tihchak nan RIDF aṭangin cheng vaibelchhe eng emaw zat hmuh a nih dawn thu sawiin, kut hnathawktute chu sorkar kuta innghat pumhlûm lo tura a chah a, an tih theih bakah sorkar chu a chêt zel tur thu a sawi bawk.

Lungleia IWR executive engineer Laldinpui sawi danin, Nulzau Minor Irrigation Project-a ni zung chakna hmanga tui lâk (pump)-na siam hi a hmasa ber a ni a; NABARD aṭanga sum hmuh nuai 58 chuang sénga siam a ni. Ram hectare 24-a zau nûl thlai châwm thei tura ruahman a ni a, loneitu 25-in an chhawr mek.

Nulzau Minor Irrigation Project hian tui dah khâwlna 16, litre 6,000 dawng leh solar pump set 16 a keng tel a; solar pump set khatin ni khatah tui litre 5,000-6,000 a pump chhuak thei a ni.