Serchhipah Crime Review neih a ni

Nimin khan Serchhip SP conference hall-ah additional SP PC Lalṭanpuia kaihhruaiin District Crime Review neih a ni a; kum hnih kal taa Serchhip district-a police-te hnathawhte an thlir lêt bakah, infuih tharna hun an hmang.

Review meeting-a tarlan danin, kum 2019 chhungin Serchhip district-ah thubuai 100 ziah luh a ni a, chargesheet 97, final report pathum, thiam loh chantir mi 53, discharge pali leh thubuai kal mek 40 a awm. Kum 2020 chhungin thubuai 83, chargesheet 64, final report pakhat, hnu chhui mek 18, thiam loh chantir mi 25, discharge pakhat leh thubuai kal mek 38 a awm thung.

Kum 2019 chhunga thubuai tam ber chu MLP Act bawhchhiatna niin, thubuai 23 ziah luh a ni a, mi rawk (burglary) thubuai 21 leh rûkrûk thubuai 20-te'n an dawt. Kum 2020 chhunga thubuai ziah luh tam ber chu rûkrûk niin, 24 chhinchhiah a ni a, mi rawk thubuai 12 leh MLP Act thubuai 11-te chu pahnihna leh pathumna a ni.

Protection of Children from Sexual Offences (POCSO) Act, hnuaiah kum 2019 chhungin thubuai pali ziah luh a ni a, kum 2020 chhungin thubuai paruk ziah luh a ni bawk.