Hlakungpui Mualah mi 6 seng lut thar

Mizo Hlakungpui Mual, Khawbungah thu leh hla lama Mizoram leh hnam tana thawh hlâwk mi paruk dah luh thar a ni a, dah luh tharte lungphun chu nimin khan minister of state Prof. Lalnilawma'n a hawng.

Nimin khan Mizo Hlakungpui Mual thawh rukna leh ruby jubilee (kum 40-na) lawm a ni a, minister of state Prof. Lalnilawma leh bialtu MLA Ramthanmawia ten an hmanpui. Minister chuan, Mizo Hlakungpui Mual buatsaih a nih theihna tura ngaihtuahna sengtute fakin, "Mi nazawng tih theih loh a ni a, Mizo Hlakungpui Muala seng luh thar mi parukte hian an phû tak zet a ni," a ti a; mi hlawhtlingte lawmpuia chawimawi tlakte chawimawi zel turin kal khawmte a sâwm.

Prof. Lalnilawma chuan, Mizo Hlakungpui Mual chu hmun hrang hranga Mizote phuar khawmtu ni se a duh thu a sawi a; Hlakungpui Mual aṭang hian Mizote harh thar a, zirna ngaisang thar tur leh ṭhalaite pawh tlawmngaihna leh hawihhâwmna vawng nung thar turin a chah. Minister hian Hlakungpui Mual ruby jubilee pualin Mizo Hlakungpui Mual Committee hnenah Rs 50,000 a pe a ni.

Khualzahawm Ramthanmawia, East Tuipui bialtu MLA pawhin thu sawiin, Mizote tana hmun pawimawh tak buatsaihtu Commit-tee leh Khawbung khawtlang chungah a lawm thu a sawi.

Inkhawm hi Mizo Hlakungpui Mual Committee chairman C Lalluia'n a kaihruai a; vice chairman H Lalniliana leh Hlakungpui Mual Selection Committee chairman B Lalthangliana bakah, seng luh thar chhungte leh seng luh tawh chhungten thu an sawi. Zanah Mizo Hlakungpui Mual kum 40-na pualin concert buatsaih a ni bawk.