Irrigation project-ah hma lakpui turin IWR Minister-in Jal Shakti MoS a ngen

Sorkar laipuia Jal Shakti minister of state Dr Raj Bushan Choudhary chu nimin khan Irrigation and Water Resources minister PC Vanlalruata nen Lok Bhavan-ah an inkâwm. PC Vanlalruata chuan, Mizoramin ruahtui a dawn ṭhat avangin tui dah khawlna ṭha zawk hmanga irrigation project-ah hma lakpui turin Union Minister a ngen.

PC Vanlalruata chuan, Mizoramin ruahtui dawng ṭha viau mah se, tui dah khawlna a awm ṭhat tâwk loh thu a sawi a, "Tlang ram chhengchhe tak kan nih avangin tuiah harsatna kan tâwk fo a, tui dah khawlna ṭha zawk kan mamawh," a ti a; tuikhuahte hmanga irrigation project Mizoramin a neih theih nan hma lakpui tura Union Minister a ngen rualin, Mizoramin lei chhunga tui verh chhuahte a chhawr ṭangkai thu a sawi.

Mizoram Chief Minister-in Jal Shakti Minister hnena lehkha a ziah tawh - cheng vbc 274.25 man Mat Valley Integrated Project atana IWR department-in DPR a siam, Bramaputra Board-a thawn thlak tawh chu en zuisak a, a rang thei ang bera sum pe tur turin PC Vanlalruata chuan Dr Raj Bushan Choudhary a ngen a; solar pump leh PMKUSUM hmanga tlang ram tui pekna rate hniam bik pawh tihsang turin a ngen a ni.

PC Vanlalruata hian Mizoram leh tlang ram dangte nena hman ṭangkai tur National Hill Water Security Mission din a, tlang ramte tuia harsatna sutkian dan tur ngaihtuah turin a ngen bawk.

Jal Shakti MoS Dr Raj Bushan Choudhary chuan, Delhi-ah Jal Shakti secretary-te a sawipui tur thu a sawi a; hun remchangah Mizorama a enkawltu department-te nen chiang zawka sawihona hun ruahman a tum thu a sawi bawk.