KHAWTHLIR

GAC-in thisen pe

Aizawl College (GAC) NSS Unit chuan nimin khan an hmunah blood donation camp an huaihawt a, Civil Hospital, Aizawl tan thisen unit 112 an pe a, petute mipa 83 leh hmeichhia 29 an ni. GAC hian kuminah March 11 khan thisen unit 250 an lo pe tawh bawk.

Anchiri man

Assam Rifles chuan April 8, Nilaini khan Lawngtlai district-a Myanmar ramri dep Zorinpui bulah dan loa tawlh anchiri (Paris polyphylla) ip 102 an man a, cheng nuai 36 hû niin an tarlang. AR hian anchiri hi truck-a an hlàn laiin an man a, Mizoram sorkara thuneitute hnenah an hlan a ni.

Mission Shakti Meeting & Training

Women & Child Development hnuaia Mission Shakti kalpui mekah nimin khan IPR Lianchhiari Rûn conference hall-ah Annual Review Meeting cum Training buatsaih a ni. Kum 2025 chhunga hnathawh dan thlir let a nih bakah, hmalak zel dan turte sawiho a ni a; hmeichhiate venhim, humhim leh chawikanna kawnga hmasawnna turte zirho a ni bawk. Zirhona hi vawiinah chhunzawma zawh a ni ang.

Green-Ag meeting

Mamit bawrhsap Suvigya S Chandra hoin nimin khan Mamit district-a agriculture leh a kaihhnawih department aiawhte'n Green-Ag project 9th Technical Support Group meeting an nei a, kum 2026-27 atana hmachhawpte tlangzarh a ni. Green-Ag project hi Food and Agriculture Organisation hnuaia Global Environment Facility ruahman niin, kum 2019 khan Mizoramah bul ṭan a ni a; Mamit leh Lunglei district-ah kalpui niin, Dampa Tiger Reserve leh Thorangtlang Wildlife Sanctuary bul hnai khaw 38-te a huam.

SA officer seminar

Salvation Army India Eastern Territory hnuaia thawk officer-te tan nimin khan Booth Mansion Conference Hall, Aizawlah review seminar leh personal interview buatsaih a ni a, vawiinah chhunzawm a ni ang. He hunah hian kum 2011-a Salvation Army officer lakte kum 15 an thawh tlin tawh avang leh major-ah an kai dawn avanga an puala buatsaih a ni a; officer-te hi April 12, 2026 Pathianni zanah ITI Corps-ah major-ah hlan kai an ni ang.