Minister hoin inhlan tharna hun hmang

Tlangnuam BDO Office-a thawkte leh Tlangnuam Block chhunga village council 13-te chuan nimin khan BDO Conference Hall-ah inhlan tharna hun an hmang. Inkhawm hi Tlangnuam BDO Josephine Zonunsangi'n a kaihruai a; RD minister Lalruatkima'n a hmanpui.

Lalruatkima chuan, VC-te chu sorkar programme tam tak tihlawhtlingtu turte an ni tih sawiin, "Ram chungchangah VC tel lo chuan Land Revenue & Settlement department a kal thei lo a, VC-te pawmpuina milin sorkarin thuthlukna a siam ṭhin avangin fimkhur zel a ṭul," a ti. Ni 100 inhlawhna chu ni 120-ah pawhsei a nih thu leh khaw hrang hrangah community hall ṭha a awm theih nan theihtawp an chhuah thu a sawi.

RD Minister chuan, Tlangnuam RD Block pisaa thawkte chu sorkar hna thawktu an nih anga an tih tur leh tih loh tur an nei tih hre turin a chah a; office-ah inzah tawn thiam tur te, dâwrtute dawngsawng ṭha tur te, file tikhawmuang lo tur te, social media-a thu dik lo thehdarh laka fimkhur turtein a chah bawk.