Mizo Sports Hall of Fame hawn a ni

Sports & Youth Services minister Lalnghinglova Hmar chuan April 8, Nilaini khan Bungzung khuaah Mizo infiammi chhuanawm bikte puala siam 'Mizo Sports Hall of Fame' a hawng.

Mizo Sports Hall of Fame-ah hian infiammi pasarih - K Kawla (L) - football, Jeje Lalpekhlua - football, S Malsawmtluanga - football, Lalremsiami Hmar - hockey, Lalremsanga - thalkah, T Zoramthanga (L) - boxing leh, Jeremy Lalrinnunga - weigntlifting te lim dah a ni.

Lalnghinglova Hmar chuan, sorkar kum tharah Mizo Sports Hall of Fame cheibâwlna atan Rs 10,00,000 dah a nih dawn thu a sawi a, "Hei hi Bungzung khuain anmahnia bul an ṭan ngam vang a ni. Tourism department hian Champhai lam kan hawi a, Mizo Sports Hall of Fame hi khualzin tam tak hîptu a la ni dawn," a ti a; Bungzung bakah khawchhak tlangdung khuaa Mizo hnam ro hlu awmnate'n tlawh a hlawh dawn thu a sawi.

Sports Minister hian Bungzungah hian volleyball court emaw, futsal ground emaw (khawtlang duh dan azirin) siamna atan Rs 15,00,000 dah a nih dawn thu a sawi a; khawtlang hruaitute hnenah football leh volleyball bakah net a hlan bawk.

Bialtu MLA Ramthanmawia pawhin thu sawiin, Mizo Sports Hall of Fame hawn a nih theihna tura Bungzung khawtlang thawhhona leh an thawhrimna ropui a tih thu a sawi a; South Tuipui bialtu MLA Jeje Lalpekhlua leh S Malsawmtluanga (Mama) bakah Aizawl Bungzung Welfare leh Champhai Bungzung Welfare aiawhte'n thu an sawi.