Serchhipah Kisan Mela & Exhibition

Agricultural Technology Management Agency (ATMA) chuan nimin khan Serchhip Bazar chung zâwlah ni hnih awh tur Kisan Mela & Exhibition an buatsaih a, Serchhip district bawrhsap Paul L Khuma’n a hawng.

Kisan Mela & Exhibition-ah hian department pariat - Agriculture, Horticulture, Fisheries, Sericulture, AH&Vety leh Land Resource, Soil and Water Conservation bakah, KVK leh ATMA leh loneitute tan stall 24 siam a ni. Hmasawnna thar an neihte leh thil siam leh thar chhuahte pho chhuah a ni a, a thlawna inentirna ‘Animal Health Clinic’ leh ‘Plant Health Clinic’ buatsaih a ni bawk.

Mela & Exhibition hawnna inkhawm hi ATMA project director Lalchhuansangi’n a kaihruai a; Paul L Khuma chuan, Mela & & Exhibition-a tel loneitute chu tunlai thiamna hmang ṭangkai tur leh mithiamte ràwn nachángte hria a, an zir chianna aṭanga thil ṭha zawk an sawite zâwm ṭhin turin a chah.

Serchhip Bawrhsap chuan, agriculture chu mihring nunphung innghahna lungphûm pawimawh, mimal leh khawtlang hriselna innghahna bulpui a nih thu sawiin, thlai hrisel tak an thar theih nan rilru dik tak pua an hnate thawk turin loneitute a chah bawk.

Kisan Mela hawnnaah hian Serchhip district agriculture officer Lalchharlian’n Serchhip district-a loneitu thawk ṭha leh buh thar tamte hnenah Farmers Award a hlan a; khaw intodelh berah Piler khua thlan niin lawmman hlan a ni.