Sawhthing bûk dan tur hriattir

Aizawl district bawrhsap Lalhriatpuia chuan Aizawl district-a sawhthing lei/hralh chungchangah January 5, 2026-a Agriculture & Farmer's Welfare department-in inkaihhruaina standard operating procedure (SOP) a tihchhuah point 12-na zâwm vek turin secondary collection centre leh primary collection centre hruaitute leh, SCC supervisor leh assistant supervisor te a hriattir.

SOP point 12-naah hian, 'SCC hruaitute nen PCC aṭanga sawhthing lo kalte chu an bûk laiin kg piahah a point lak a nih loh nan an lo enpui ang. Entir nan, PCC/SCC-a bûk laiin kg 235.64 ni ta se, kg 235 chiah ziah lan tur. SCC a thlen veleh a bûk pawh hralh mai a nih loh chuan a rihna a tlakhniam theih (weight loss) avangin a tak taka a leitu sumdawng (buyer)-te'n an lak huna a rih zawng kha pawisa dawn nana chhût tur a ni. Hetiang harsatna hi mahni SCC-ah ṭheuh chinfel tur a ni a, sorkar lam pûr loh tur a ni,' tih a inziak.

Aizawl DC chuan, "SCC zawng zawnga sawhthing bûk chungchangah Agriculture department-in January 5, 2026-a Standard Operating Procedure (Point No.12) a lo tihchhuah tawh chu zawm tur a ni," a ti a; sawhthing bûk rih zawng chu SCC a luh dawnah emaw, PCC aṭanga a chhuah dawnah an bûk a nih pawhin, hralh dawna a bûk rih zawng chauh kha pawisa dawn nana chhût tur a nih thu a tarlang.